Zaburi 105

45 verses

Zaburi 105:1

Nimushime Uwiteka mwambaze izina rye, Mwamamaze imirimo yakoze mu mahanga.

Zaburi 105:2

Mumuririmbire, mumuririmbire ishimwe, Muvuge imirimo itangaza yakoze yose.

Zaburi 105:3

Mwirate izina rye ryera, Imitima y'abashaka Uwiteka yishime.

Zaburi 105:4

Mushake Uwiteka n'imbaraga ze, Mushake mu maso he iteka ryose.

Zaburi 105:5

Mwibuke imirimo itangaza yakoze, Ibitangaza bye n'amateka yo mu kanwa ke,

Zaburi 105:6

Mwa rubyaro rwa Aburahamu umugaragu we mwe, Mwa bana ba Yakobo mwe, abo yatoranije.

Zaburi 105:7

Uwiteka ni we Mana yacu, Amateka ye ari mu isi yose.

Zaburi 105:8

Yibuka isezerano rye iminsi yose, Ijambo yategetse aryibuka ibihe ibihumbi.

Zaburi 105:9

Ni ryo sezerano yasezeranye na Aburahamu, Indahiro yarahiye Isaka,

Zaburi 105:10

Akayikomereza Yakobo kuba itegeko, Ayikomereza Isirayeli kuba isezerano ridashira.

Zaburi 105:11

Ati “Ni wowe nzaha igihugu cya Kanāni, Kuba umwandu ukugenewe.”

Zaburi 105:12

Umubare wabo ukiri muke, Muke cyane na bo ari abashyitsi muri icyo gihugu,

Zaburi 105:13

Bazerera mu mahanga atari amwe, Bava mu bwami bajya mu bundi.

Zaburi 105:14

Ntiyakundira umuntu ko abarenganya, Yahaniye abami ko babagiriye nabi.

Zaburi 105:15

Ati “Ntimukore ku bo nasīze, Ntimugire icyo mutwara abahanuzi banjye.”

Zaburi 105:16

Ahamagara inzara ngo itere mu gihugu, Avuna inkoni yose bishingikirije, Ni yo mutsima wabo.

Zaburi 105:17

Atuma umugabo wo kubabanziriza, Ni Yosefu waguriwe kuba imbata.

Zaburi 105:18

Bababarisha ibirenge bye iminyururu, Bamushyiraho ibyuma,

Zaburi 105:19

Kugeza aho ijambo ry'Uwiteka ryasohoreye, Isezerano rye ryaramugeragezaga.

Zaburi 105:20

Umwami yaratumye baramubohora, Umutegeka w'amahanga yaramurekuye.

Zaburi 105:21

Amugira umutware w'urugo rwe, Amubitsa ibintu bye byose,

Zaburi 105:22

Ngo abohe abakomeye be uko ashaka, Yigishe abakuru be ubwenge.

Zaburi 105:23

Kandi Isirayeli ajya muri Egiputa, Yakobo atura mu gihugu cya Hamu.

Zaburi 105:24

Kandi Uwiteka agwiza ubwoko bwe cyane, Abaha gukomera kuruta abanzi babo.

Zaburi 105:25

Ahindura imitima y'abo ngabo ngo bange ubwoko bwe, Bagira ubwenge bwo kurimbura abagaragu be.

Zaburi 105:26

Atuma Mose umugaragu we, Na Aroni yatoranije.

Zaburi 105:27

Bashyira hagati yabo ibimenyetso bye, Bakorera ibitangaza mu gihugu cya Hamu.

Zaburi 105:28

Yohereza umwijima atuma riba ijoro, Na bo ntibagomera amagambo ye.

Zaburi 105:29

Ahindura amazi yabo amaraso, Yica amafi yabo.

Zaburi 105:30

Igihugu cyabo cyuzura ibikeri, Mu mazu y'abami babo.

Zaburi 105:31

Arategeka amarumbo y'isazi araza, N'inda mu gihugu cyabo cyose.

Zaburi 105:32

Abaha urubura mu cyimbo cy'imvura, N'umuriro waka mu gihugu cyabo.

Zaburi 105:33

Akubita imizabibu yabo n'imitini yabo, Avuna ibiti byo mu gihugu cyabo.

Zaburi 105:34

Arategeka inzige ziraza, N'uburima bitabarika.

Zaburi 105:35

Birya n'imboga zose zo mu gihigu cyabo, Birya imbuto z'ubutaka bwabo.

Zaburi 105:36

Kandi akubita abana b'imfura bose, Bo mu gihugu cyabo arabica, Gukomera kwabo kose ni bo kwari kwatangiriyeho.

Zaburi 105:37

Akuramo ba bandi, Bafite ifeza n'izahabu, Nta munyantege nke n'umwe, Wari uri mu miryango ye yose.

Zaburi 105:38

Abanyegiputa bishimira kugenda kwabo, Kuko gutera ubwoba kwabo kwari kubafashe.

Zaburi 105:39

Asanzura igicu cyo kubatwikīra, N'umuriro wo kubamurikira nijoro.

Zaburi 105:40

Barasaba azana inkware, Abahaza umutsima wo mu ijuru.

Zaburi 105:41

Atobora igitare amazi aradudubiza, Atemba ahantu humye haba umugezi.

Zaburi 105:42

Kuko yibutse ijambo rye ryera, Na Aburahamu umugaragu we.

Zaburi 105:43

Akurayo ubwoko bwe bwishimye, Intore ze azikurayo ziririmba.

Zaburi 105:44

Abaha ubutaka bw'abanyamahanga, Batwara ibyo abanyamahanga baruhiye.

Zaburi 105:45

Bibera bityo kugira ngo bitondere amategeko ye, Bakurikize ibyo yategetse. Haleluya.

← Zaburi 104Zaburi 106 →