Zaburi 148

14 verses

Zaburi 148:1

Haleluya. Nimushimire Uwiteka mu ijuru, Nimumushire ahantu ho mu ijuru.

Zaburi 148:2

Mwa bamarayika be mwese mwe, nimumushime, Mwa ngabo ze zose mwe, nimumushime.

Zaburi 148:3

Mwa zuba n'ukwezi mwe, nimumushime, Mwa nyenyeri z'umucyo mwe, nimumushime.

Zaburi 148:4

Wa juru risumba amajuru we, mushime, Nawe mazi yo hejuru y'ijuru.

Zaburi 148:5

Bishimire izina ry'Uwiteka, Kuko ari we wategetse bikaremwa.

Zaburi 148:6

Kandi yabikomereje guhama iteka ryose, Yategetse itegeko ridakuka.

Zaburi 148:7

Nimushimire Uwiteka mu isi, Mwa bifi mwe n'imuhengeri hose.

Zaburi 148:8

Nawe muriro n'urubura na shelegi n'igihu, Nawe muyaga w'ishuheri, usohoza ijambo rye.

Zaburi 148:9

Namwe misozi miremire n'udusozi twose, Namwe biti byera imbuto ziribwa n'imyerezi yose.

Zaburi 148:10

Namwe nyamaswa n'amatungo yose, Namwe bikururuka n'inyoni zifite amababa.

Zaburi 148:11

Namwe bami bo mu isi n'amahanga yose, Namwe abakomeye n'abacamanza bo mu isi mwese.

Zaburi 148:12

Namwe basore n'inkumi, Namwe basaza n'abana.

Zaburi 148:13

Bishimire izina ry'Uwiteka, Kuko izina rye ryonyine ari ryo rishyirwa hejuru, Icyubahiro cye kiri hejuru y'isi n'ijuru.

Zaburi 148:14

Kandi yashyiriye hejuru ubwoko bwe ihembe, Ni byo ashimirwa n'abakunzi be bose, Ari bo bana ba Isirayeli, Ubwoko bumuri bugufi. Haleluya.