Zaburi 69

37 verses

Zaburi 69:1

Zaburi iyi yahimbiwe umutware w'abaririmbyi babwirisha inanga ijwi ryitwa “Amarebe.” Ni Zaburi ya Dawidi.

Zaburi 69:2

Mana, nkiza kuko amazi ageze no ku bugingo bwanjye.

Zaburi 69:3

Ndigise mu byondo birebire, Bidafite aho umuntu yahagarara, Ngeze muri nyina umuvumbi urantembana.

Zaburi 69:4

Kurira kuranduhije umuhogo wanjye urumye, Amaso yanjye yarerutse ngitegereza Imana yanjye.

Zaburi 69:5

Abanyangira ubusa baruta umusatsi wo ku mutwe wanjye ubwinshi Abashaka kundimbura bampora impamvu z'ibinyoma barakomeye, Ni bwo narihishijwe icyo ntanyaze.

Zaburi 69:6

Mana, ni wowe uzi ubupfu bwanjye, Ibyaha byanjye ntubihishwa.

Zaburi 69:7

Mwami, Uwiteka Nyiringabo, Abagutegereza be kumwazwa n'ibyanjye, Mana y'Abisirayeli, Abagushaka be guterwa igisuzuguriro n'ibyanjye.

Zaburi 69:8

Kuko nihanganira ibitutsi bakuntukira, Mu maso hanjye huzuye ipfunwe.

Zaburi 69:9

Mpindutse umushyitsi kuri bene data, N'umunyamahanga kuri bene mama.

Zaburi 69:10

Kuko ishyaka ry'inzu yawe rindya, Ibitutsi by'abagutuka byaguye kuri jye.

Zaburi 69:11

Ubwo nariraga ngahanisha umutima wanjye kwiyiriza ubusa, Byampindukiye ibitutsi.

Zaburi 69:12

Ubwo nambaraga ibigunira, Nabaye iciro ry'imigani kuri bo.

Zaburi 69:13

Abicara mu marembo baramvuga, Ndi indirimbo y'abasinzi.

Zaburi 69:14

Ariko jyeweho ni wowe nsenga Uwiteka, Mana, mu gihe cyo kwemererwamo, Ku bwo kugira neza kwawe kwinshi, Unsubirishe umurava w'agakiza kawe.

Zaburi 69:15

Unsayure mu byondo ne kurigita, Nkire abanyanga nkire n'amazi maremare.

Zaburi 69:16

Umuvumba we kuntembana, Imihengeri he kumira, Rwa rwobo rwe kumbumbiraho umunwa warwo.

Zaburi 69:17

Uwiteka, unsubize kuko imbabazi zawe ari nziza, Unkebuke nk'uko kugira neza kwawe ari kwinshi.

Zaburi 69:18

Kandi jyewe umugaragu wawe ntumpishe mu maso hawe, Kuko mfite umubabaro unsubize vuba.

Zaburi 69:19

Wegere ubugingo bwanjye ubukize, Uncungure ku bw'abanzi banjye.

Zaburi 69:20

Ni wowe uzi uko ntukwa, N'isoni zanjye n'igisuzuguriro cyanjye na byo urabizi, Abanzi banjye bose bari imbere yawe.

Zaburi 69:21

Ibitutsi byamenaguye umutima ndarwaye cyane, Nashatse uwangirira imbabazi ariko ntihaboneka n'umwe, Nashatse abo kumara umubabaro ndababura.

Zaburi 69:22

Kandi bampaye indurwe kuba ibyokurya byanjye, Ngize inyota bampa umushari wa vino.

Zaburi 69:23

Ameza yabo imbere yabo ahinduke ikigoyi, Bakiri mu mahoro ahinduke umutego.

Zaburi 69:24

Amaso yabo ahumwe batareba, Uhindishe umushyitsi ikiyunguyungu cyabo iteka.

Zaburi 69:25

Ubasukeho uburakari bwawe, Umujinya w'inkazi wawe ubagereho.

Zaburi 69:26

Iwabo hasigare ubusa, Kandi ntihakagire uba mu mahema yabo.

Zaburi 69:27

Kuko bagenza uwo wakubise, Kandi bavuga umubabaro w'abo wakomerekeje.

Zaburi 69:28

Rundanya ibyaha ku byaha byabo, Be kwinjira mu byo gukiranuka kwawe.

Zaburi 69:29

Basibanganywe mu gitabo cy'ubugingo, Be kwandikanwa n'abakiranutsi.

Zaburi 69:30

Ariko jyeweho ndi umunyamubabaro ndaribwa, Mana, agakiza kawe kanshyire hejuru.

Zaburi 69:31

Nzashimisha izina ry'Imana indirimbo, Nzayihimbarisha ishimwe ry'ibyo yankoreye.

Zaburi 69:32

Ibyo bizanezeza Uwiteka birushe impfizi, Cyangwa ikimasa gifite amahembe cyatūye inzara.

Zaburi 69:33

Abagwaneza bazabireba bishime, Mwa bashaka Imana mwe, Imitima yanyu isubizwemo ubugingo.

Zaburi 69:34

Kuko Uwiteka yumva abakene, Ntasuzugura abe bari mu nzu y'imbohe.

Zaburi 69:35

Ijuru n'isi bimushime, N'inyanja n'ibizigendamo byose.

Zaburi 69:36

Kuko Imana izakiza i Siyoni, Ikubaka imidugudu ya Yuda, Bazayibamo igihugu kibabere gakondo.

Zaburi 69:37

Kandi urubyaro rw'abagaragu bayo ruzakiragwa, Abakunda izina ryayo bazagituramo.

← Zaburi 68 Zaburi 70 →