Zaburi 80

20 verses

Zaburi 80:1

Zaburi iyi yahimbiwe umutware w'abaririmbyi babwirisha inanga ijwi ryitwa “Ibyahamijwe ni nk'amarebe”. Ni Zaburi ya Asafu .

Zaburi 80:2

Wa mwungeri w'Abisirayeli we, tege ugutwi, Ni wowe ushorera Abayosefu nk'umukumbi,

Zaburi 80:3

Imbere y'Abefurayimu n'Ababenyamini n'Abamanase, Kangura imbaraga zawe uze udukize.

Zaburi 80:4

Mana, utwigarurire, Umurikishe mu maso hawe natwe turakira.

Zaburi 80:5

Uwiteka Mana Nyiringabo, Uburakari bwawe buzageza he gucumbira ku ugusenga k'ubwoko bwawe?

Zaburi 80:6

Wabagaburiye amarira menshi nk'umutsima, Wabahaye amarira menshi yo kunywa.

Zaburi 80:7

Utugize rurwanirwa rw'abaturanyi bacu, Abanzi bacu badusekera hamwe.

Zaburi 80:8

Mana Nyiringabo, utwigarurire, Umurikishe mu maso hawe natwe turakira.

Zaburi 80:9

Wakuye umuzabibu muri Egiputa, Wirukana amahanga urawutera.

Zaburi 80:10

Uharura imbere yawo, Na wo ushora imizi wuzura igihugu.

Zaburi 80:11

Imisozi itwikīrwa n'igicucu cyawo, N'imyerezi y'Imana iterwa igicucu n'amashami yawo.

Zaburi 80:12

Ugaba amashami agera no ku nyanja, Kandi amashami yawo agera no kuri rwa ruzi.

Zaburi 80:13

Ni iki cyatumye usenya inzitiro zawo, Ngo abahisi bose bawusorome?

Zaburi 80:14

Ingurube yo mu ishyamba irawangiza, Inyamaswa zo mu gasozi zirawona.

Zaburi 80:15

Mana Nyiringabo, turakwinginze garuka, Urebe mu isi, uri mu ijuru ubirebe, Ugenderere uwo muzabibu.

Zaburi 80:16

Rinda icyo ukuboko kwawe kw'iburyo kwateye, N'ishami wikomereje.

Zaburi 80:17

Uwo muzabibu waratwitswe, waraciwe, Barimburwa no guhana ko mu maso hawe.

Zaburi 80:18

Ukuboko kwawe kube ku muntu wo mu kuboko kwawe kw'iburyo, Umwana w'umuntu wikomereje.

Zaburi 80:19

Nuko rero natwe ntituzasubira inyuma ngo tuguhararuke, Tuzure natwe turambaza izina ryawe.

Zaburi 80:20

Uwiteka, Mana Nyiringabo utwigarurire, Umurikishe mu maso hawe natwe turakira.