Zaburi 89

53 verses

Zaburi 89:1

Indirimbo yahimbishijwe ubwenge ya Etani Umunyezerahi.

Zaburi 89:2

Nzaririmba iteka imbabazi z'Uwiteka,

Zaburi 89:3

Kuko navuze nti “Imbabazi zizakomezwa iteka, No mu ijuru ubwaho uzahashimangira umurava wawe.”

Zaburi 89:4

“Nasezeranye isezerano n'uwo natoranije, Narahiye Dawidi umugaragu wanjye

Zaburi 89:5

Nti ‘Nzashimangira urubyaro rwawe iteka, Intebe yawe y'ubwami nzayikomeza, Ukageza ibihe byose.’ ” Sela.

Zaburi 89:6

Uwiteka, ijuru rizashima ibitangaza byawe, Umurava wawe uzashimirwa mu iteraniro ry'abera.

Zaburi 89:7

Ni nde wo mu ijuru wagereranywa n'Uwiteka? Ni nde wo mu bana b'Imana uhwanye n'Uwiteka?

Zaburi 89:8

Ni we Mana iteye ubwoba bwinshi mu rukiko rw'abera, Ni iyo gutinywa kurusha abayikikije bose.

Zaburi 89:9

Uwiteka, Mana Nyiringabo, Ni nde munyambaraga uhwanye nawe, Uwiteka? Umurava wawe urakugose impande zose.

Zaburi 89:10

Ni wowe utegeka kwihinduriza kw'inyanja, Iyo umuraba wayo uhagurutse urawutūrisha.

Zaburi 89:11

Ni wowe wamenaguye Rahabu imeze nk'uwishwe, Watatanishije ababisha bawe ukoboko kw'imbaraga zawe.

Zaburi 89:12

Ijuru ni iryawe, isi na yo ni iyawe, Isi n'ibiyuzuye ni wowe wabishimangiye.

Zaburi 89:13

Ikasikazi n'ikusi ni wowe waharemye, I Taboru n'i Herumoni hishimira izina ryawe.

Zaburi 89:14

Ufite ukuboko kw'imbaraga, Ukuboko kwawe kurakomeye, Ukuboko kwawe kw'iburyo gushyizwe hejuru.

Zaburi 89:15

Gukiranuka no guca imanza zitabera ni imfatiro z'intebe yawe, Imbabazi n'umurava birakubanziriza.

Zaburi 89:16

Hahirwa ishyanga rizi ijwi ry'impundu, Uwiteka, rigendera mu mucyo wo mu maso hawe.

Zaburi 89:17

Bishimira izina ryawe umunsi ukīra, Kandi gukiranuka kwawe ni ko kubashyirisha hejuru.

Zaburi 89:18

Kuko uri icyubahiro cy'imbaraga zabo, Imbabazi zawe ni zo zizashyirisha hejuru ihembe ryacu.

Zaburi 89:19

Kuko ingabo idukingira ari Uwiteka, Umwami wacu ari Uwera wa Isirayeli.

Zaburi 89:20

Cya gihe wabwiriye abakunzi bawe mu byo beretswe uti “Mpaye umunyambaraga gufasha kwanjye, Nshyize hejuru uwatoranijwe mu bantu.

Zaburi 89:21

Mbonye Dawidi umugaragu wanjye, Musīze amavuta yanjye yera.

Zaburi 89:22

Ikiganza cyanjye kizajya kibana na we, Ukuboko kwanjye kuzamukomeza.

Zaburi 89:23

Umwanzi we ntazamutungura, Kandi umunyabyaha ntazamugirira nabi.

Zaburi 89:24

Nanjye nzakubita ababisha be bagwe imbere ye, Nzakubita abamwanga.

Zaburi 89:25

Ariko umurava wanjye n'imbabazi zanjye bizabana na we, Kandi izina ryanjye rizashyirisha hejuru ihembe rye.

Zaburi 89:26

Nzashyira inyanja mu ntoki ze, N'inzūzi mu kuboko kwe kw'iburyo.

Zaburi 89:27

Azantakira ati ‘Ni wowe Data, Imana yanjye, Igitare cy'agakiza kanjye.’

Zaburi 89:28

Kandi nzamuhindura impfura yanjye, Asumbe abandi bami bo mu isi.

Zaburi 89:29

Nzamubikira imbabazi zanjye iteka ryose, Isezerano ryanjye rizakomera kuri we.

Zaburi 89:30

Kandi nzaramisha urubyaro rwe iteka ryose, Nzaramisha intebe ye y'ubwami nk'iminsi y'ijuru.

Zaburi 89:31

“Niba abana be bazareka amategeko yanjye, Ntibagendere mu byo nategetse,

Zaburi 89:32

Niba bazaca ku mateka yanjye, Ntibitondere amategeko yanjye,

Zaburi 89:33

Ni bwo nzahōrēsha ibicumuro byabo inkoni, No gukiranirwa kwabo nzaguhōrēsha kubakubita.

Zaburi 89:34

Ariko sinzamukuraho rwose imbabazi zanjye, Sinzivuguruza umurava wanjye.

Zaburi 89:35

Sinzica isezerano ryanjye, Sinzahindura ijambo ryavuye mu kanwa kanjye.

Zaburi 89:36

“Igihe kimwe narahiye kwera kwanjye, Sinzabeshya Dawidi.

Zaburi 89:37

Urubyaro rwe ruzarama iteka, Intebe ye y'ubwami izarama nk'izuba imbere yanjye.

Zaburi 89:38

Izakomezwa iteka ryose nk'ukwezi, Mu ijuru hariho ubihamya wo kwizerwa.” Sela.

Zaburi 89:39

Ariko ubwawe wataye kure uwo wasīze uramureka, Wamugiriye umujinya.

Zaburi 89:40

Wanze urunuka isezerano ry'umugaragu wawe, Wahumanishije ikamba rye kurijugunya hasi.

Zaburi 89:41

Wagushije inkike ze zose, Washenye ibihome bye.

Zaburi 89:42

Abahisi bose baramunyaga, Abaye igitutsi ku baturanyi be.

Zaburi 89:43

Washyize hejuru ukuboko kw'iburyo kw'ababisha be, Wishimishije abanzi be bose.

Zaburi 89:44

Ni koko usubiza inyuma ubugi bw'inkota ye, Kandi ntiwamuhaye guhagarara ashikamye mu ntambara.

Zaburi 89:45

Wamazeho ubwiza bwe, Wajugunye intebe ye y'ubwami hasi

Zaburi 89:46

Wagabanije iminsi y'ubusore bwe, Wamwambitse isoni. Sela.

Zaburi 89:47

Uwiteka, uzageza he kwihisha iteka? Umujinya wawe uzageza he kwaka nk'umuriro?

Zaburi 89:48

Ibuka ko ndi uw'igihe gito, Erega abana b'abantu bose wabaremeye ubusa!

Zaburi 89:49

Ni nde uzarama ntapfe, Agakiza ubugingo bwe ukuboko kw'ikuzimu? Sela.

Zaburi 89:50

Mwami, imbabazi zawe za kera ziri he, Warahiye Dawidi ku bw'umurava wawe?

Zaburi 89:51

Mwami, ibuka ibitutsi batuka abagaragu bawe, Uko niyumanganya mu mutima iby'amahanga yose uko ari menshi.

Zaburi 89:52

Uwiteka, ibuka ibitutsi by'abanzi bawe, Batutse intambwe z'uwo wasīze.

Zaburi 89:53

Uwiteka ahimbazwe iteka ryose. Amen kandi Amen.

← Zaburi 88Zaburi 90 →