Zaburi 29

11 verses

Zaburi 29:1

Zaburi ya Dawidi. Mwāturire Uwiteka mwa bana b'Imana mwe, Mwāturire Uwiteka ko afite icyubahiro n'imbaraga.

Zaburi 29:2

Mwāturire Uwiteka ko izina rye rifite icyubahiro, Musenge Uwiteka mwambaye ibyera.

Zaburi 29:3

Ijwi ry'Uwiteka rihindira hejuru y'amazi, Imana y'icyubahiro ihindisha inkuba, Ni koko Uwiteka ahindishiriza inkuba hejuru y'amazi menshi.

Zaburi 29:4

Ijwi ry'Uwiteka rifite imbaraga, Ijwi ry'Uwiteka ryuzuye igitinyiro.

Zaburi 29:5

Ijwi ry'Uwiteka rimena imyerezi, Uwiteka amenagura imyerezi y'i Lebanoni.

Zaburi 29:6

Ayikinisha nk'inyana y'inka, Lebanoni n'i Siriyoni ahakinisha nk'inyana y'imbogo.

Zaburi 29:7

Ijwi ry'Uwiteka rishwaza ibirimi by'umuriro.

Zaburi 29:8

Ijwi ry'Uwiteka rihindisha ubutayu umushyitsi, Uwiteka ahindisha umushyitsi ubutayu bw'i Kadeshi.

Zaburi 29:9

Ijwi ry'Uwiteka riramburuza impara, Kandi rikokōra amashyamba, Kandi mu rusengero rwe byose bikavuga biti “Icyubahiro kibe icyawe.”

Zaburi 29:10

Uwiteka yari yicaye ku ntebe y'ubwami bwe, Hejuru ya wa Mwuzūre, Ni koko Uwiteka ahora yimye iteka ryose, yicaye ku ntebe ye.

Zaburi 29:11

Uwiteka azaha ubwoko bwe imbaraga, Uwiteka azaha ubwoko bwe umugisha, ari wo mahoro.